Ես հարգում եմ Nintendo ընկերությունը: Ոչ միայն NES/SNES խաղային համակարգերի հետ կապված բարի հիշողությունների հաշվին, այլ նաև ներկայումս կոնսոլների շուկա նորարարություն մտցնելու համար:
Այնպես որ, երբ Nintendo-ն նոր սարք է հայտարարում, դա միանգամից հետաքրքիր է: Ցավոք, Nintendo Switch-ի տեխնիկական բնութագրերը դեռ հասանելի չեն, ու սարքի մասին կարող ենք դատել միայն Nintendo-ի հրապարակած տեսանյութի ու մի քանի լուսանկարների միջոցով:
Այսպիսով, փորձենք հասկանալ, թե ինչ է Nintendo Switch-ը:
Մենք նորից տեսնում ենք ոչ իտերատիվ, լրիվ թարմ մոտեցում: Այս անգամ Nintendo-ն կարծես թե որոշել է համատեղել իր պորտատիվ ու տնային կոնսոլները՝ պլանշետ, կոնտրոլլեր որը կարելի է օգտագործել թե՛ առանձին, թե՛ կես-կես, թե՛ պլանշետի վրա կցված: Նման փորձ արդեն արել էր NVIDIA-ն իր Shield-ով: Բայց եթե Shield-ն ուներ խաղերի բավականին սուղ ցանկ, ու հիմնականում դրական գիծը ձեր համակարգչի վրայի խաղերը ցանցով stream անելն էր, ապա Nintendo Switch-ը լիարժեք կոնսոլ է, որը կարող է անցնել պորտատիվ ռեժիմի: Տեսահոլովակն արդեն ցուցադրում է բավականին տպավորիչ խաղադարան՝ ես հասցրեցի նկատել հետևյալ խաղերը.
- The Legend of Zelda: Breath of the Wild
- The Elder Scrolls 5: Skyrim
- Նոր Super Mario
- NBA շարքի խաղ
- Splatoon
- Mario Kart
Ինչը թեև կանխատեսելի, բայց բավականին կայուն խաղացանկ է նոր թողարկվող կոնսոլի համար: Հետաքրքիր է, որ Switch-ը կարողանում է նույն խաղերն ապահովել թե՛ ստացիոնար, թե՛ պորտատիվ ռեժիմներում: Ենթադրում եմ, որ պորտատիվ ռեժիմում այն HD720 resolution է ապահովում, իսկ եթե docking station-ը հնարավորություն է տալիս լավացնել սարքի գրաֆիկական հնարավորությունները, ապա ստացիոնար ռեժիմում միգուցե HD1080 ապահովի:
Բնականաբար, առաջանում են մի քանի հարցեր, որոնց տեսահոլովակը չի կարող պատասխանել. սարքի քաշը պորտատիվ ռեժիմում, մարտկոցով աշխատանքի տևողությունը, լրացուցիչ լիցքավորող սարքի հնարավորությունը և այլն: Դեռ հայտնի չեն նաև սարքի գինը, արդյոք էկրանը touchscreen է, ստիլուս նախատեսվում է, թե ոչ, և այլն:
Սարքի ամենագրավիչ հատկություններից էր մուլտիպլեերը: Ավելի ճիշտ՝ մուլտիպլեերի բոլոր տեսակները, որ սարքն ապահովում էր՝ split-screen, կոնտրոլլերը կես-կես օգտագործել, երկու և ավելի սարքով խաղալ իրար հետ:
Այնպես որ՝ Nintendo Switch-ը խոստումնալից սարք է, բայց արդյոք այն կենսունակ կլինի ժամանակակից կոնսոլային շուկայում՝ կկարողանանք ասել միայն երբ հայտնի լինեն խաղի գինն ու խաղացողների անձնական փորձը սարքի հետ:
Nintendo Switch-ը խանութներում կհայտնվի 2017-ի մարտին:
No comments:
Post a Comment