Giveaway - ավարտված է

The Armenian Backlog-ը աշնան վերջի առթիվ կազմակերպում է giveaway՝ ձրի խաղ նվիրել: Առաջին տեղը հաղթողը կստանա Company of Heroes խաղը՝ THQ-ի թողարկած VGX ու Satellite մրցանակների հաղթող ստրատեգիան: Երկրորդ տեղը հաղթողը կստանա Pressure խաղը՝ հումորային shoot-em-up-ի ու racing-ի խառնուրդ: Մասնակցելու համար մեկնաբանություն թողեք այս գրառման տակ (միայն մեկ մեկնաբանություն, հակառակ դեպքում ավտոմատ մրցույթից դուրս կհայտարարվեք): Հաղթողը կորոշվի պատահականության սկզբունքով՝ երեք օրվա ընթացքում: Խաղերը տեղադրելու ու խաղալու համար անհրաժեշտ է ունենալ Steam-ի բաժանորդագրություն:

Հաջողություն եմ մաղթում:

Ավարտված է. ամեն մեկնաբանողին հատկացվել է համար (1-ից 9, վերևից ներքև), հետո Random.org ծառայության միջոցով տաս պատահական թիվ են գեներացվել: Թվերն են՝ 4, 8, 5, 8, 2, 4, 3, 4, 1, 4:

Առաջին տեղը հաղթել է #4 համարը ստացած մասնակիցը: Երկրորդը՝ #8 համարը ստացածը: Ահա թվերի հաջորդականությունն ու timestamp-ը.

Հայկ ու Հրաչ, շնորհավորանքներս: Ես ձեզ հետ կկապվեմ:

Sale: The Monstrous Fall Sale GOG.com-ում

Քանի որ Հելլոուինի վաճառքները զբաղվածության պատճառով բաց թողեցի, փորձեմ լրացնել բացն ավելի հետևողական լինելով հետագայում: Երեկվանից GOG.com-ում սկսել է նոր վաճառք՝ The Monstrous Fall Sale: Փորձեմ օգնել ձեզ առավելագույնս հասկանալ այն ու օգտվել վաճառքի առանձնահատկություններից:

Նախ՝ մտեք GOG.com-ի հիմնական էջ: Դուք մեկ օր ունեք լրիվ անվճար ձեր խաղադարանին Little Big Adventure 2 խաղն ավելացնելու համար: Դրա համար ձեզ պետք է ընդամենը գրանցված լինել GOG-ում:

Եթե մասնակցել եք ամառային վաճառքին, ապա բեդջերի հասկացությունը ձեզ ծանոթ կլինի: Այստեղ դուք կարող եք տեսնել, թե ինչքան XP եք հավաքել ձեր գնումներով ու նույն էջի վրա նշված գործողությունները կատարելով (ամեն օր check in լինել, գնալ GOG.com-ի տարբեր ծառայությունների էջեր ու ծանոթանալ նոր ծառայություններին, տաս նոր խաղ ավելացնել wishlist-ին, տարածել նորությունը Facebook և Twitter սոցիալական ցանցերում և այլն): 5000 XP հավաքելու դեպքում դուք անվճար կստանաք Expeditions: Conquistador խաղը, 15000-ի դեպքում՝ DEX, 30000-ի դեպքում՝ Victor Vran: Ցավոք, երեք խաղերից ոչ մեկին ես ծանոթ չեմ:

Անցնենք ամենակարևորին՝ զեղչերին: Բոլոր զեղչերն անիմաստ կլինի թվարկել, քանի որ դրանց կարող եք GOG.com-ում էլ ծանոթանալ, բայց նշեմ մի քանի խաղ, որոնք թե՛ լավն են, թե՛ $1-ից ցածր գին ունեն այս վաճառքին:

The Void ($0.79). Ice Pick Lodge ռուսական ընկերության խաղը միգուցե այսօր գրաֆիկապես այնքան տպավորիչ չի, ինչքան թողարկման պահին, բայց այն եղել ու մնում է ամենաօրիգինալ ու ատմոսֆերիկ աշխատանքներից, որ ես տեսել եմ: Արագ հղում:

The Witcher Enhanced Edition ($0.49). խաղը սկսեց Witcher-ների շարքը և, իմ կարծիքով, մնաց շարքի ամենալավ ներկայացուցիչը: Enhanced Edition-ն ընդլայնված ու վերամշակված տարբերակ է, որը ներառում է տարբեր թողարկումներում կտրված content-ը: Արագ հղում:

Torchlight ($0.59). Diablo-ի ստեղծողները Blizzard Entertainment-ը թողնելուց հետո ցրվեցին տարբեր թիմերով, ու ստեղծեցին մի քանի Diablo-ի հոգևոր ժառանգ: Torchlight-ն, իմ կարծիքով, իրենցից ամենահաջողվածն է: Արագ հղում:

Դե, բարի գնումներ: Ուրախ կլինեմ, եթե մեկնաբանություններում կիսվեք, թե ինչ խաղեր ընտրեցիք այս վաճառքին և ինչու:

Խաղերի էմուլյացիա PC և Android համակարգերի վրա

2000-ականների առաջին կեսին Հայաստանի գեյմերների շրջանում էմուլյատորները բավականին պոպուլյար էին, որովհետև «կոմպյուտերանոցների» ժամանակաշրջանն ավարտվել էր, իսկ կոնսոլներ ոչ բոլորն ունեին: Դրան ավելացնենք որոշ դասական կոնսոլների արտադրությունից դուրս գալը (օրինակ՝ SNES, Sega Genesis), և այդ կոնսոլների վրա արտակարգ խաղերի առկայությունը (օրինակ՝ Final Fantasy VI): Չնայած վերջին շրջանում դասական խաղերի վերակենդանացմանն ուղղված միտումներին (remaster-ների ու պաշտոնական էմուլյատորների միջոցով), իրենց զգալի մասը դեռ հասանելի է կամ օրիգինալ կոնսոլների ու կարտրիջների/սկավառակների, կամ էմուլյատորների միջոցով:

Այստեղ ես ինֆորմացիա կտեղադրեմ աշխատող, նորմալ էմուլյատորների մասին ինչպես PC-ների, այնպես էլ Android սարքերի վրա (որովհետև, անձնական փորձից եմ ասում, Playstation 1-ի ու SNES-ի խաղեր Amazon Fire HD-ի վրա խաղալը մաքուր երջանկություն է): Չեն տեղադրվի ներկայումս արտադրվող/վաճառվող սարքերի էմուլյատորներ (ինչպիսին է Wii U-ն)՝ այդ սարքերի վաճառքին չխանգարելու ու խաղերի piracy-ին չնպաստելու նպատակով: Չեն տեղադրվի նաև խաղերի/սարքերի բիոսների հղումներ, քանի որ դա ապօրինի է: Կարծում եմ՝ դուք այդ հարցում ինքնուրույն կկողմնորոշվեք: Ցանկը, բնականաբար, ժամանակի հետ կընդլայնվի ու կլրացվի:

Scream Fortress VIII-ը սկսել է

Team Fortress 2 խաղացողները կարող են ուրախանալ՝ այս տարի էլ իրենց սպասում է Scream Fortress իրադարձությունը՝ հատուկ կոսմետիկ drop-երով, Scream Fortress խաղային ռեժիմով ու դասական քարտեզներով, երեք նոր Հելոուինի թեմայով քարտեզներով, նոր պայմանագրերով, որոնք իրականացնելու դեպքում կարող եք drop-եր ստանալ, և այլն: Այլ կերպ ասած՝ նորից եկել է MEDIC!!! գոռալու ժամանակը: Առավել մանրամասն Scream Fortress VIII-ի մասին կարող եք կարդալ TF2-ի պաշտոնական կայքում:

Team Fortress 2-ը Steam-ի միջոցով Windows, OSX, Linux համակարգերի համար 
 անվճար հասանելի է այստեղ:

NVIDIA GeForce 375.57 դրայվերներ

NVIDIA-ն թողարկել է GeForce տեսաքարտերի  նոր 375.57 դրայվերներ GeForce 400, 500, 600, 700, 900 ու GeForce 10 ընտանիքների սարքերի համար: Դրայվերներն ապահովում են օպտիմիզացիա Battlefield 1, Titanfall 2 ու Civilization VI խաղերի համար, ինչպես նաև VR-օպտիմիզացիա Eagle Flight ու Serious Sam VR: The Last Hope խաղերի համար: 375.57-ը նաև ներառում է 3D Vision, Sli պրոֆիլներ բազմաթիվ խաղերի համար, բագերի ուղղումներ (օրինակ՝ Mirror's Edge Catalyst-ի Ansel UI-ի վրա թարթելու ու Overwatch-ի decal-ների փչանալու խնդիրները): Առավել մանրամասն 375.57 թարմացման մասին կարող եք կարդալ այստեղ:

Wasteland 3-ի ֆինանսավորումն անցել է $3 միլիոնից

Wasteland 3-ը, որի մասին մենք արդեն գրել ենք, միայն Fig պլատֆորմով կարողացել է $3 միլիոնից ավել ֆինանսավորում ստանալ:

Եթե տեղյակ եք crowdfounding-ի մոդելից, խաղը ստեղծողները նշում են, թե ինչքան գումար է իրենց պետք խաղը սարքելու համար: Նրանք նաև նշում են stretch goal-ներ՝ եթե ֆինանսավորումը գերազանցի անհրաժեշտ գումարը, խաղի մեջ լրացուցիչ պարունակություն կավելացվի:

TES V Skyrim Special Edition, նոր տրեյլեր

Bethesda Softworks-ը հրապարակել է The Elder Scrolls V Skyrim: Special Edition-ի երկրորդ տրեյլերը.

Այս գրառումը գրելու պահին Skyrim Special Edition-ի թողարկմանը մնացել է մոտ 5 օր, 22 ժամ: Տրեյլերը ևս մեկ անգամ ցուցադրում է հին ու նոր սերնդի կոնսոլների վրա Skyrim-ի գրաֆիկայի տարբերությունները: Իհարկե, PC-ի վրա խաղացողների զգալի մասը մոդերի շնորհիվ վաղուց սովորել է շրջանցել խաղի գրաֆիկական սահմանափակումները, բայց տրեյլերն իրոք տպավորիչ է:

Հիշեցնեմ, որ PC-ի վրա The Elder Scrolls Skyrim: Legendary Edition կամ սովորական Skyrim-ը բոլոր DLC-ներով ունեցողները Special Edition-ը կստանան անվճար: Այն հասանելի կլինի նաև PS4 և XBOX One կոնսոլների վրա ու կարժենա լիարժեք $60:

PLAYSTATION 4: Հաճախակի տրվող հարցեր

Ավելորդ անգամ չծավալվելով խաղային սարքերի առավելությունների և թերությունների շուրջ, ու չփորձելով պլատֆորմային պատերազմների նոր ալիք բարձրացնել, փորձեցի գրել փոքրիկ ուղեցույց Playstation 4 գնած մարդկանց համար՝ հիշելով PS4-ի մասին իմ ամենահաճախ լսած հարցերը:

Nintendo Switch մաս երկրորդ

Այսօր՝ Nintendo Switch-ի թողարկման հաջորդ օրը, արդեն կարող ենք պատասխանել նոր կոնսոլի հետ կապված որոշ հարցերի: Նախ կգովեմ Switch-ի մարկետինգը: Ի տարբերություն Wii U-ի, երբ հայտարարման պահին գեյմերները պատկերացում չունեին, թե ինչ է այն՝ պլանշետ-կոնտրոլլեր Wii-ի համար, պորտատիվ կոնսոլ, թե առանձին սարք, այս դեպքում Nintendo-ն կարողացավ մի տեսահոլովակով ցույց տալ իր սարքի բնութագրիչ գծերը:

Հիմա վատ նորություն՝ թեև Bethesda-ն հաստատել է իր համագործակցությունը Nintendo-ի հետ (ինչպես շատ ուրիշ խոշոր խաղային ընկերություններ՝ EA, Activision և այլն), տեսահոլովակում Skyrim-ի ցուցադրումը դեռ չի նշանակում, որ Skyrim-ը թողարկվելու է Nintendo Switch-ի վրա: Տեսահոլովակը նպատակ ուներ ցույց տալ, թե ինչպես Skyrim-ը կխաղացվեր Switch-ի վրա:

Switch: նոր տնային/պորտատիվ կոնսոլ Nintendo-ից

Ես հարգում եմ Nintendo ընկերությունը: Ոչ միայն NES/SNES խաղային համակարգերի հետ կապված բարի հիշողությունների հաշվին, այլ նաև ներկայումս կոնսոլների շուկա նորարարություն մտցնելու համար:

Այնպես որ, երբ Nintendo-ն նոր սարք է հայտարարում, դա միանգամից հետաքրքիր է: Ցավոք, Nintendo Switch-ի տեխնիկական բնութագրերը դեռ հասանելի չեն, ու սարքի մասին կարող ենք դատել միայն Nintendo-ի հրապարակած տեսանյութի ու մի քանի լուսանկարների միջոցով:

Այսպիսով, փորձենք հասկանալ, թե ինչ է Nintendo Switch-ը: